امام علی رحمان می‌گوید که تاجیکستان تقویت مرز مشترک با افغانستان را به عنوان یکی از اولویت‌های ریاست دوره‌ای خود بر سازمان پیمان امنیت جمعی تعیین کرده است.
رییس‌جمهوری تاجیکستان در نشست شورای امنیت جمعی این سازمان گفته که کشورش تشدید مبارزه با هراس‌افگنی، افراط‌گرایی، قاچاق مواد مخدر و جرایم فراملی را نیز به عنوان اولویت تعیین کرده است.
رحمان افزوده است: «در سال ریاست خود بر این سازمان، قصد داریم تلاش‌های‌مان را در راستای تقویت بیشتر امنیت منطقه‌ای، بر اساس شعار ریاست خود – امنیت جمعی، تقویت مرزها، ثبات منطقه و مسئولیت مشترک – متمرکز سازیم.»
این نشست روز گذشته به ریاست ولادیمیر پوتین، رییس‌جمهوری روسیه، در کاخ کرملین برگزار شد و در آن روسای‌‌جمهوری بلاروس، قزاقستان، قرغیزستان و تاجیکستان و دبیرکل سازمان پیمان امنیت جمعی حضور داشتند.
مقام‌های ارشد کشورها، مانند وزیران خارجه، نیز در این نشست شرکت کردند.
روسیه در سال ۲۰۲۶ ریاست دوره‌ای سازمان پیمان امنیت جمعی را بر عهده داشت و تاجیکستان قرار است سال آینده این مسئولیت را بر عهده بگیرد.
گفتنی است که تاجیکستان در سال‌های گذشته گواه فعالیت‌های قاچاقچیان مواد مخدر در مرز مشترک خود با افغانستان بوده است.
روسیه نیز نگران حضور شبه‌نظامیان در ولایت‌های شمالی افغانستان است.
وزیر خارجه‌ی روسیه پیشتر گفته بود در مناطقی از افغانستان که با تاجیکستان، ازبیکستان و ترکمنستان هم‌مرز هستند، «حضور چشم‌گیر گروه‌های هراس‌افگن و افراطی و اردوگاه‌های آموزشی و پایگاه‌های آنان همچنان ادامه دارد.»
