کارسون رلیتز راکر، کاردار موقت سفارت امریکا در دوشنبه، می‌گوید که ایالات متحده و تاجیکستان در کنار یک‌دیگر به مبارزه علیه «هراس‌افگنانی» که امنیت و ثبات دو کشور را تهدید می‌کنند، ادامه خواهند.
او می‌افزاید که امریکا در پنج سال گذشته حدود 40 میلیون دالر کمک به نهادهای مجری قانون تاجیکستان برای مبارزه با هراس‌افگنی ارائه کرده است و واحدهای مبارزه با هراس‌افگنی این کشور را تجهیز کرده و آموزش داده است.
راکر یادآوری کرده که امریکا از زمان استقلال تاجیکستان، به این کشور بیش از 400 میلیون دالر کمک امنیتی کرده است.
او اظهار داشته است که دولت ایالات متحده تنها در چند سال گذشته با هدف کمک به تامین امنیت مرزهای تاجیکستان، میلیون‌ها دالر اختصاص داده است.
کارسون ریلتز راکر تاکید کرده: «این کمک‌ها توانایی نیروهای امنیتی شما را برای گشت‌زنی در مناطق وسیع کوهستانی و واکنش سریع و به موقع به موارد نقض مرزی افزایش داده است.»
او در مقاله‌ای که چند روز پیش منتشر شد، یادآوری کرده است که امریکا از نخستین کشورهایی بود که تاجیکستان را پس از استقلالش در سال 1991 به رسمیت شناخت و باور دارد که تاجیکستانی مستقل و دارای حاکمیت برای منطقه و جهان مهم است.
قاچاقچیان افغانستان با عبور غیرقانونی از مرز، مواد مخدر را به تاجیکستان انتقال می‌دهند. این تلاش‌ها با واکنش مرزبانان تاجیکستانی مواجه می‌شوند.
به گفته‌ی مقام‌های تاجیکستانی، تنها در شش ماه نخست سال 2026 میلادی، 7 مورد درگیری با قاچاقچیان افغانستان در مرز ثبت شده که منجر به کشته شدن 17 تن از آنان شده است.
