سراج‌الدین مهرالدین، وزیر خارجه‌ی تاجیکستان، امروز در نشستی با حضور نمایندگان کشورهای عضو سازمان همکاری شانگهای گفت که توسعه‌ی پایدار آسیای مرکزی به تحقق صلح در افغانستان وابسته است.
بر بنیاد گزارش خبرگزاری آسیاپلس، او افزود که تاجیکستان همواره از فعال‌سازی تلاش‌های بین‌المللی برای کمک به حل سیاسی وضعیت افغانستان حمایت می‌کند.
مهرالدین گفت که دوشنبه از تلاش‌ها برای رساندن کمک‌های بشردوستانه به افغانستان و گسترش روابط اقتصادی [با طالبان] حمایت می‌کند.
وزیر خارجه‌ی تاجیکستان ادامه داد که کشورش از «توسعه‌ی اتصال‌های حمل‌ونقل و انرژی» که به گفته‌ی او، می‌تواند انگیزه‌‌ی بیشتری جهت توسعه‌ی صلح‌آمیز برای مردم رنج‌دیده‌ی افغانستان ایجاد کند، پشتیبانی می‌کند.
او این اظهارات را در نشستی در شهر دوشنبه مطرح کرد. در این رویداد نمایندگان کشورهای عضو سازمان همکاری شانگهای در مورد موضوعات مربوط به صلح پایدار و توسعه‌ی همکاری‌ها در حوزه‌های مهاجرت، مقابله با هراس‌افگنی، تغییرات اقلیمی، فناوری‌های نوین و هوش مصنوعی بحث و تبادل نظر کردند.
