وزارت حمل‌ونقل تاجیکستان اعلام کرد که کارهای ساخت‌وساز جاده‌ی «قلعه‌ی خمب – وانج» که در مرز با بدخشان قرار دارد را اکنون از سر نمی‌گیرد، زیرا تهدیدات ناشی از افغانستان همچنان پابرجا هستند.
این جاده بخشی از شاهراه دوشنبه – کولما است که تاجیکستان را به چین وصل می‌سازد، اما کار ساخت‌وساز آن به دلیل حملات مسلحانه از خاک افغانستان به تعویق افتاده است.
«شرکت جاده و پل چین» مسئول ساخت جاده‌ی «قلعه‌ی خمب – وانج» است و در 9 قوس کارگران آن در منطقه‌ی درواز مورد حمله‌ی مسلحانه از خاک افغانستان قرار گرفتند. در این حمله سه شهروند چین کشته شدند.
این شرکت از ماه سپتمبر 2022 به ساخت‌وساز این جاده مشغول بود. وزارت حمل‌ونقل تاجیکستان گفت که به دستور سفارت چین در دوشنبه، از 10 قوس فعالیت «شرکت جاده و پل چین» موقتاً متوقف شد.
بعداً نیز از خاک افغانستان به تاجیکستان دو حمله‌ی دیگر صورت گرفت و هر سه حمله باعث کشته‌شدن 10 تن و زخمی‌شدن دست‌کم 5 تن شدند.
دولت تاجیکستان از طالبان افغانستان خواست که از مردم آن کشور به دلیل ناتوانی در مهار تهدیدات فرامرزی عذرخواهی کند.
طالبان وعده‌ی همکاری برای شناسایی و بازداشت عاملان این رویدادها را داد و گفت که «حلقات مغرض» در پی تخریب روابط طالبان و تاجیکستان هستند.
چین از شهروندان و شرکت‌های این کشور خواسته است که از مناطق مرزی افغانستان و تاجیکستان و همچنین ولایت‌های تخار و بدخشان افغانستان بیرون شوند.
