خبرگزاری آسیا پلس گزارش داده است که طالبان فعالیت قنسولگری افغانستان در شهر خاروغ تاجیکستان را متوقف و سرپرست این قنسولگری را برکنار کرده است.
وزارت خارجه‌ی تاجیکستان به این خبرگزاری گفت: «این تصمیم خود حکومت حاکم در افغانستان (طالبان) است. ما در جریان این مسئله قرار داریم. طبق توافق‌نامه‌های بین‌المللی، آغاز یا توقف فعالیت قنسولگری در یک کشور دیگر، کار خود حکومت کشورها است.»
نقیب‌الله دهقان‌زاده، سرپرست قنسولگری افغانستان در خاروغ دو سال پیش اعلام کرد که این نمایندگی دیپلوماتیک مستقیماً تحت حمایت و هدایت وزارت خارجه‌ی طالبان فعالیت می‌کند.
سراج‌الدین مهرالدین، وزیر خارجه‌ی تاجیکستان در فبروری 2024 اعلام کرد: «هیات کارکنان قنسولگری افغانستان در خاروغ پس از سال 2020 تغییر نکرده است. افرادی کار می‌کنند که در سال 2020 اعتبارنامه دریافت کرده بودند. اگر آن‌ها (طالبان) قنسول جدیدی معرفی کنند، این کار خودشان است.»
تاجیکستان تنها کشور آسیای مرکزی است که کمترین تعامل را با طالبان داشته است. با این حال، در هفته‌های پسین مقام‌های این کشور نیز تعداد دیدارهای خود با مقام‌های طالبان را افزایش داده است که احتمال نرمش در سیاست دوشنبه در قبال طالبان را افزایش می‌دهد.
