ولادیمیر سمریکوف، معاون دبیرکل سازمان پیمان امنیت جمعی در نشستی در مسکو گفت که مرز تاجیکستان با افغانستان باید تقویت شود.
او گفت که هدف از تقویت این مرز تامین امنیت کشورهای عضو سازمان یادشده در برابر «چالش‌ها و تهدیدهایی است که از قلمرو افغانستان ناشی می‌شوند.»
سمریکوف بر اجرای «برنامه‌ی هدف‌مند بین‌دولتی» سازمان پیمان امنیت جمعی برای تقویت مرز تاجیکستان و افغانستان تاکید کرد.
این برنامه سال گذشته تصویب شد و قرار است تا سال 2029 میلادی، در سه مرحله، تکمیل شود. اهدف این برنامه تقویت زیرساخت‌های نظامی جنوب تاجیکستان هستند.
قرار است «برنامه‌ی هدف‌مند بین‌دولتی» از سال 2026 آغاز شود.
در روزهای گذشته، دو حمله از خاک افغانستان بر تاجیکستان صورت گرفته است که نگرانی دوشنبه را به دنبال داشت. این حملات را پاکستان، تاجیکستان، چین، طالبان، ایران و سازمان پیمان امنیت جمعی نکوهش کردند.
به نظر می‌رسد تلاش‌های تاجیکستان برای مطرح‌کردن تهدید ناشی از افغانستان شدت یافته‌اند.
سراج‌الدین مهرالدین، وزیر خارجه‌ی تاجیکستان روز گذشته در سی‌ودومین نشست شورای وزیران خارجه‌ی سازمان امنیت و همکاری اروپا سخنرانی کرد.
او با اشاره به حملات از افغانستان، از کشورهای عضو سازمان یادشده خواست همکاری‌های خود را گسترش دهند تا بتوانند به طور موثر به چالش‌های کلیدی دنیای معاصر پاسخ دهند.
در همین روز، وزیر خارجه‌ی تاجیکستان در دیدار با همتای فنلندی و پولندی خود درباره‌ی افغانستان گفت‌وگو کرد. مشخص نیست آن‌ها دقیقاً درباره‌ی چه صحبت کردند.
روسیه، بلاروس، قزاقستان، تاجیکستان، قرغیزستان و ارمنستان کشورهای عضو سازمان پیمان امنیت جمعی هستند.
