ذبیحالله مجاهد، سخنگوی طالبان اعلام کرد که نیروهای این گروه با نیروهای تاجیکستانی در بخش جلوگیری از قاچاق مواد مخدر هماهنگی و همکاری دارند.
او وقوع رویداد پسین در مرز افغانستان و تاجیکستان را تایید کرد و افزود قاچاقچیان تلاش کردند که به خاک تاجیکستان وارد شوند، اما با واکنش نیروهای مرزی آن کشور مواجه شدند.
مجاهد گفت که برای «سالیان سال» قاچاقچیان در مرز افغانستان و تاجیکستان رفتوآمد میکردند و طولانیبودن این مرز باعث شده که رویدادهای مشابه گاهی رخ دهند.
او افزود که طالبان تمام تلاش خود را میکند تا در مرزهای افغانستان مشکلی رخ ندهد و جلو قاچاق مواد مخدر گرفته شود.
کمیتهی امنیت ملی جمهوری تاجیکستان گفته است که ۵ قاچاقچی اهل افغانستان حوالی ساعت ۷:۳۰ شام پنجشنبه به صورت غیرقانونی وارد قلمرو آن کشور شدند. در درگیری با نیروهای تاجیکستانی، سه قاچاقچی کشته شدند و دو تن دیگر به افغانستان عقبنشینی کردند.
در حدود دو ماه گذشته ۵ رویداد مرگبار در مرز افغانستان و تاجیکستان رخ داده که مجموعاً جان ۱۷ تن را گرفتند. ۴ مورد از این رویدادها «هراسافگنانه» و یک مورد دیگر «عبور غیرقانونی قاچاقچیان مسلح» عنوان شده است.
