بحث درباره‌ی سفارت افغانستان در دوشنبه؛ هیات تاجیکستانی وارد کابل شد

رادیو و تلویزیون ملی تحت اداره‌ی طالبان اعلام کرد که یک هیات بلندپایه‌ی تاجیکستانی، پیش از چاشت امروز (شنبه، 24 عقرب) وارد کابل شده است.

بر بنیاد گزارش، هدف از سفر این هیات، گسترش روابط سیاسی، اقتصادی و امنیتی میان طالبان و تاجیکستان می‌باشد.

قرار است این هیات با مقام‌های طالبان در مورد همکاری‌های آینده، موضوع سفارت افغانستان در تاجیکستان و دیگر موضوعات گفت‌وگو کند.

گفتنی‌ است که سفارت افغانستان در دوشنبه اکنون تحت کنترول دیپلومات‌های دوره‌ی جمهوری است.

خبرگزاری باختر که تحت اداره‌ی طالبان است، گزارش داده که در ترکیب هیات تاجیکستانی، نمایندگانی از وزارت خارجه، اداره‌های امنیتی و دیگر نهادهای مهم آن کشور حضور دارند.

تاجیکستان تنها کشور آسیای مرکزی است که در طول چهار سال گذشته، کمترین تعامل را با طالبان داشته است. کارشناسان می‌گویند که دوشنبه این رویکرد را به دلیل نزدیکی به مخالفان طالبان، به ویژه جبهه‌ی مقاومت، اتخاذ کرده بود.

شبکه‌ی خبری الجزیره در اوایل میزان گزارش داده بود که تاجیکستان، برخلاف گذشته، سیاست‌ «واقع‌گرایانه‌تری» نسبت به طالبان در پیش گرفته است.

وحیدالله محمودی، سفیر پیشین افغانستان در تاجیکستان به الجزیره گفت که دوشنبه در ابتدای سال ۲۰۲۵، سیاست‌ خارجی خود نسبت به افغانستان را تغییر داد. این در حالی‌ست که به گفته‌ی او، تاجیکستان تنها کشوری بود که تا اواخر ۲۰۲۴، از مخالفان طالبان حمایت می‌کرد.

شاه محمود، معاون وزارت دفاع دولت پیشین افغانستان گفت که تاجیکستان نمی‌تواند به تنهایی از عهده‌ی فراهم‌سازی پناهگاه به مخالفان طالبان برآید، آن‌هم در شرایطی که این مخالفان در ۴ سال گذشته «پیشرفتی نداشته‌اند» و دیگر کشورهای آسیای میانه با این گروه روابط اقتصادی و بازرگانی برقرار کرده‌اند.