هیات تاجیکستانی پس از امیرخان متقی، با نورالله نوری، وزیر امور سرحدات، اقوام و قبایل طالبان دیدار کرد.
در این دیدار، هیاتهای طالبان و تاجیکستان در مورد مشکلات سرحدی، تثبیت سرحد مشترک، امنیت و گسترش روابط گفتوگو کردند.
بر بنیاد بیانیهی طالبان، ریاست هیات تاجیکستانی را میرزازاده عبدالواحد، معاون نخست کمیتهی نیروهای سرحدی تاجیکستان بر دوش داشت.
نورالله نوری از برداشتن «گامهای مثبت» طالبان و تاجیکستان برای گسترش روابط دوجانبه استقبال کرد و گفت طالبان تلاش میکند با تمام کشورهای جهان روابط اقتصادی، سیاسی و دوستانه داشته باشد.
نوری افزود که این گروه به طور جدی از قاچاق مواد مخدر و قاچاق انسان جلوگیری میکند و برای تحقق این اهداف هبتالله فرمانی نیز صادر کرده است.
او تاکید کرد: «تثبیت سرحد مشترک میان افغانستان و تاجیکستان نقش موثری در ثبات و امنیت هر دو کشور ایفا میکند.»
به گفتهی طالبان، عبدالواحد گفت که افغانستان و تاجیکستان مشترکات زبانی و دینی دارند و مردمان هر دو کشور خواستان امنیت هستند. او افزود: «تاجیکستان متعهد است روابط خود با افغانستان (طالبان) را در بخش اقتصادی و دیگر بخشها گسترش دهد.»
رییس هیات تاجیکستانی ابراز امیدواری کرد که دو طرف مشترکاً مشکلات موجود در امتداد سرحد را از طریق تفاهم حل کنند و به همکاری در این زمینه ادامه دهند.
